«Kulturak gure eguneroko bizitza osatzen duten gaiei buruz pentsatzen ere laguntzen digu. Erakusketa honek giza loturez, konfiantzaz eta bizitzan zehar aurkitzen ditugun babesen garrantziaz hitz egiten du»
Gasteizko Montehermoso Kulturuneak ‘Aldi horietatik guztietatik’ erakusketa inauguratuko du ostiralean, uztailaren 18an, eta irailaren 13ra bitarte izango du ikusgai. Jone Elorriaga artista bizkaitarraren proposamena da, eta bizitzan zehar lagun ditugun giza harremanei, konfiantzari eta laguntza sareei buruz hausnartzera gonbidatuko du.
Erakusketa ostegun honetan aurkeztu dute Sonia Diaz de Corcuera Gasteizko Udaleko Kultura eta Hezkuntza zinegotziak eta artistak berak. Erakusketa Montehermosoko Proiektu Artistikoen Ekoizpenerako Laguntzen Deialdiaren parte da. Programa horren bidez, kulturuneak sorkuntza garaikidea sustatu eta tokiko artisten proiektuen garapena eta hedapena bultzatzen du. Jone Elorriagaren proiektua aurten ekimenaren barruan ikusgai egongo den laugarrena da.
Aurkezpenean, Montehermosok sorkuntza artistikoari laguntzeko espazio gisa betetzen duen zeregina nabarmendu du Diaz de Corcuerak: «Montehermoso erreferentziazko espazioa da kultura garaikiderako eta gure inguruko talentu artistikoa bultzatzeko. Deialdi honen bidez, artistei baliabideak, laguntza eta beren proiektuak garatzeko eta herritarrekin partekatzeko lekua eskaintzen dizkiegu».
Jone Elorriagaren proposamena pertsonen arteko harremanetan sortzen diren erronkei eta horiei aurre egiteko erabiltzen ditugun tresnei buruzko hausnarketatik abiatzen da. Artistak babesa, bultzada, segurtasuna, oreka, pisua, arintasuna edo inertzia bezalako kontzeptuak ikertzen ditu zaurgarritasunaz, konfiantzaz eta elkarren zaintzaz hitz egiten duen obra eraikitzeko.
‘Aldi horietatik guztietatik’ erakusketak gure bizitzako hainbat unetan eusten gaituzten pertsonen eta sareen garrantziari buruzko begirada pertsonala planteatzen du, publikoa esperientzia partekatuei eta emozio unibertsalei buruz hausnartzera gonbidatuz.
«Kulturak gure eguneroko bizitza osatzen duten gaiei buruz pentsatzen ere laguntzen digu. Erakusketa honek giza loturez, konfiantzaz eta bizitzan zehar aurkitzen ditugun babesen garrantziaz hitz egiten du», gaineratu du zinegotziak.
Jone Elorriaga (Durango, Bizkaia, 1993) Arte graduatua da Euskal Herriko Unibertsitatean (EHU), eta azken urteotan gero eta ibilbide sendoagoa egin du sorkuntza garaikidearen esparruan. ‘Lanean’ proiektuan parte hartu du Rekalde Aretoan, Alacanteko Las Cigarreras Kultur Etxean erakutsi du bere lana, eta Guggenheim Bilbao Museoko auditoriumean aritu da ‘Pensar Mañana’ proiektuaren barruan, besteak beste. Gainera, Eusko Jaurlaritzaren, Bizkaiko Foru Aldundiaren eta beste kultur erakunde batzuen bekak eta laguntzak jaso ditu sorkuntza artistikorako.
Erakusketaren inaugurazioa ostiralean izango da, 19:00etan, eta artista durangarra ere bertan izango da. Erakusketa irailaren 13ra arte egongo da zabalik Montehermosoko Ortuño aretoan.
