Arabako Foru Aldundiak desgaitasun egoera duten pertsonei laguntzak emango dizkie
Arabako Foru Aldundiak, Gizarte Politiken Sailaren bidez, desgaitasun egoera aitortuta duten pertsonei zuzendutako banakako laguntzen deialdia iragarri du. Guztira, 160.000 euro bideratuko dira laguntza horiei. Eskaera aurkezteko epea astelehen honetan, martxoaren 23an, hasi da eta irailaren 15ean bukatuko da.
Foru erakundeak adierazi du laguntzen helburua onuradunen bizi kalitatea hobetzea dela. Horrekin batera, desgaitasun egoeran dauden pertsonen autonomia, garapen pertsonala eta gizarteratzea sustatzea da asmoa. Laguntzak produktu baten erabilera lagatzeko edo eskuratzeko, eta etxebizitzan edo ibilgailu partikularrean egokitzapenak egiteko balioko dute.
2025eko irailaren 16tik 2026ko irailaren 15era bitartean eskuratutako laguntzak izango dira finantzatuko direnak. Iaz, guztira 174 diru laguntza eman ziren, gehienak laguntza produktuetan, hala nola gurpil aulki, ibilgailuen egokitzapen eta ohe artikulatuetara bideratuta.
Era berean, laguntzak etxebizitzako irisgarritasuna hobetzeko ere bideratuko dira, arkitektura oztopoak kentzeko, igogailuak, arrapalak eta bainugelak egokituz. Etxeko lanetarako, zaintzarako eta komunikazioa errazteko laguntza produktuak ere diruz lagunduko dira.