Eusko Jaurlaritzaren inbertsio plana Europako Inbertsio Bankuan
Luxenburgon, Europako Inbertsio Bankuaren egoitzan, Eusko Jaurlaritzako ordezkaritza bat lanean jarri da gaur goizean. Noël d’Anjou, Ogasun eta Finantzetako sailburua, bertan izan da, halaber, Finantza Politikako eta Aurrekontuko sailburuorde José Corchón, Finantzen Euskal Institutuko zuzendari Amaia del Villar eta Euskadiren EBrako ordezkari Marta Marin. Jean-Christophe Laloux, Europar Batasuneko Mailegu eta Aholkularitza Eragiketen zuzendari nagusia, Europako Inbertsio Bankuaren aldetik parte hartu du.
Bileraren helburua bi erakundeen arteko lankidetza indartzea izan da, ondorengo hiru ildo estrategikoen aurrerapenak partekatuz: Euskadi Eraldatuz 2030 Inbertsio Plana, Azpiegitura eta Ekipamendu Sanitarioen Programa, eta Etxebizitzako Gizarte Funtsa, etxebizitza eskuragarrien eskaintza handitzeko. D’Anjou sailburuak aditzera eman duenez, hurrengo urteetako erronka ekonomiko, teknologiko eta sozialei aurre egiteko estrategia nagusia Euskadi Eraldatuz 2030 Inbertsio Plana dela. Ekimen hauek, eredu bat sortzea bilatzen dute, trantsizio energetikoaren, aldaketa demografikoen eta autonomia estrategikoa indartzeko beharren aurrean.
Lan-bilera honen bidez, Eusko Jaurlaritzak Europako Inbertsio Bankuarekin duen elkarlanaren indarra berresten du. Noël d’Anjou sailburuak azken urteetan egindako lan bikaina azpimarratu du, osasun-azpiegituren, produkzio-inbertsioaren eta berrikuntzaren arloetan. Elkarlan hori sendoa izaten jarraitzeko borondatea agertu du, Euskadiren lehiakortasuna eta gizarte-ongizatea sustatuz.
