Topaketetan testigantzak grabatuko dira
Gasteizko Landatxo gizarte etxearen 40. urteurrena ospatzeko egitarauak herritarren parte hartzearen aldeko apustua egiten darrai ‘Alde Zaharra gure argazkietan’ proiektua abian jarrita. Proiektuak auzoaren memoria kolektiboa berreraikitzera gonbidatuko du, argazkien eta horiek gogorarazten dituzten istorio pertsonalen bidez.
Gasteizko Udaletik jakinarazi dutenez, Landazuri, Koroatzea eta San Prudentzioko Bizan zentroek sustatutako ekimenak Alde Zaharrarekin lotura duten edo izan duten pertsona guztiak gonbidatzen ditu parte hartzera, argazki esanguratsu bat eta hark gordetzen duen oroitzapena partekatuz.
Irudiak duela gutxikoak edo duela hamarkada batzuetako familia albumekoak izan daitezke, jasotzen duten historia baita garrantzitsuena: ospakizuna, saltokia, kalea, festa, auzokideen arteko topaketa edo auzoaren bilakaera bizi izan dutenen ikuspegitik azaltzen lagunduko duen beste edozein une.
Miren Fernandez de Landa, Gobernu Irekiaren eta Gizarte Etxeen zinegotziak, adierazi duenez, «pertsona guztiok gure bizitzako une garrantzitsu batera garamatzan argazkiren bat gordetzen dugu. Proiektu honen bidez, istorio indibidual horiek gure hiriko gune enblematikoenaren kontakizun kolektibo bihurtzea nahi dugu. Urteetan zehar auzoa eraiki dutenak aitortzeko eta ondare hori belaunaldi berriekin partekatzeko modua da».
«Ekimen honek oso ondo islatzen du Landatxo gizarte etxearen 40. urteurrenaren espiritua: herritarrekin eta herritarrentzat eraikitako ospakizuna, non parte hartzea, memoria eta belaunaldien arteko loturak diren benetako protagonistak», azaldu du.
Proiektuaren helburua ibilbide eta jatorri desberdinetako pertsonen esperientzien bidez Alde Zaharreko aberastasuna eta aniztasuna islatuko dituen bizipenen mosaikoa biltzea da, argazki bakoitzak «begirada desberdina» emango baitu, «guztien artean auzoaren nortasunari eta bilakaerari buruzko kontakizun partekatua eraikitzeko».
Lekukotasun horiek biltzeko bost topaketa parte hartzaile antolatu dira, irailaren 7an, 14an, 21ean eta 28an eta urriaren 5ean, 18:00etatik 20:00etara, Landatxo gizarte etxean. Interesa duten pertsonek saio batean edo batzuetan parte hartu ahal izango dute, argazki baten istorioa partekatuz edo entzule gisa joanez, betiere edukierak aukera ematen badu.
Topaketetan testigantzak grabatuko dira, esperientzien mosaikoa jasoko duen ikus-entzunezko pieza egiteko eta istorio pertsonalek Alde Zaharreko memoria partekatua eraikitzen nola laguntzen duten erakusteko. Izen-emateak irekita daude jada 945 161 418 edo 945 161 420 telefonora deituta edota bizan.landazuri.animacion@vitoria-gasteiz.org helbide elektronikora idatzita.
